عناقيد عناقيد، موقع ثقافي فكري جامع مستقل.
عبد العالي الوالي| المغرب
طير حر طاير
شق في السما طريقو
يصول ويجول في الهوى
حتى حاجة ما تعيقو
يرسي على ريوس الجبال
بين سهول وديان جوال
يسعى يقلب على رزقو
بنتليه بذرة
وقيلة ثمرة تحت شجرة
جبر الطعام لي يعشقو
حوّْم عليه ونزل
نقْب نقْبة بالمهل
وطرطق فخ شنقو
بغا يهرب ويرفرف
مخلوع مرهوب خايف
آناري على حصلة شكون يعتقو
قال شكون هذا لي مدالي
وأنا طاير في العلالي
ياك ما كلتليه حقو
ياك ما تعديت عليه
وقيلة هذ شي لي يخليه
يصيد لي يسرقو
أنا ما تعديت حدود
ما حليت باب مسدود
بقفولة كان مطرقو
الأرض أرض الله
والواد ماعندو مولاه
وإلا قال الصياد بلادي كلشي يصدقو.
